政情：梁君彥停黃碧雲發言爆罵戰

點人數期間一舊雲同傳媒講，佢發言期間講緊特區政府嘅管治事務，但未講完就畀梁君彥多番插嘴警告佢，又停佢發言。一舊雲認為梁君彥濫權禁止議員發言，「似乎唔啱聽就話你離題」，又話政府如果唔改善管治，放幾多億港元儲備落去都係無補於事，認為立法機關監察政府嘅職能被削弱，批評梁君彥嘅行為非常離譜。

後來會議繼續，一舊雲嘅黨友林卓廷問梁君彥，民主派議員一講到警暴就係離題，但明明議員葉劉淑儀先前都講到港台問題啦，點解就唔算離題呢？梁解釋港台撥款屬於草案內容，又叫輪候發言嘅議員莫乃光開始發言。

喺呢個時候，許智峯就話覺得一舊雲並無離題，跟住仲提出規程問題，梁即刻打斷許，話自己已作出裁決喇！許就大聲質問梁「喺咪中聯辦嘅看門狗」，引起議員起哄，議員陸頌雄即刻喺位叫「美國狗」。梁叫許收回言論，認為條問題對佢極度侮辱，但許無收回言論，而梁就叫莫繼續發言。