政情:西九一哥立會耍太極

前西九管理局行政總裁謝卓飛,試用期未夠就快閃,玩殘特區政府。前車可鑑,唔少議員趁尋日新總裁連納智第一次出席立法會會議,都半帶關心同忠告,問佢適應好未、小心香港政治環境。連納智就硬銷自己讀政治出身,而且喺聯合國做過官嘅父親又教過佢唔少嘢,講政治無難度,仲即場表演其政治手腕,就西九陷於超支嘅問題,向議員大耍太極。

講到口臭都未動工嘅西九,人事變動如車輪轉。連納智尋日首次同議員喺會議廳碰頭,立法會議員李慧琼就擔心佢會步謝卓飛後塵,因適應唔到本港政治氣候而萌生去意。民主黨李永達(高達)就提點連納智,唔好睇小港府官僚作風,有幾多鴻圖大志都要有耐性。步入四十歲嘅陳淑莊就慨嘆,雖然女人好鍾意聽到承諾,但連納智都係唔好承諾太多喇,畀心機做已經好好了。

連納智信心滿滿回應話,佢來港後適應毫無問題,最差情況就係除非佢死咗啦!不過,佢自言自己剛滿六十歲,仲有大把時間做嘢,更拉埋老婆落水,話老婆尋朝到咗香港,遲啲就會幫佢搵屋,十月正式由澳洲搬嚟香港住添。唔單止咁,連納智話,雖然佢一生從事藝術娛樂界,但佢攻讀政治出身,就快八十九歲嘅老父又喺聯合國做過官,佢喺老父身上學懂如何處理國際層面問題。

大家寒暄過後開始進入正題,西九工程受通脹及建築成本上漲六成一影響,造價勢必陷超支局面。陳淑莊話政府一筆過撥畀西九嗰二百一十六億,連本都未用就話唔夠錢使,實在難以接受。高達提議不如縮細西九嘅規模,或者分期興建時分得好啲。專業會議何鍾泰更批評,乜都未做又話唔夠錢,點解可以話唔夠呢?質疑連納智嚟立法會放風準備再攞錢。

唔認放風撲水

議員一講錢就兇神惡煞,連納智亦唔係省油燈,佢承認依家個造價貴咗,但唔少地標建築物都未搞設計比賽,難言到時建造費係咪會貴咗,況且仲有二百幾億撥款以外、涉及可持續設施嘅四十億元開支,有待西九同政府點樣攤分,總之力撐自己唔係上嚟攞錢,係應立會要求解釋財務安排啫。雖然今次被連納智拆得掂,但西九實屬政治議題,一不小心隨時惹火上身,而超支一事醜婦終須見家翁,佢都係做定準備應戰好過啦。

Money18免費即秒股票報價網站現推出8升級功能,財經資訊,實時實發!