政情：宮殿式公廁配套渣 田二少暗寸區會唔做嘢

供水沖水去水都有問題

田二少喺片段開首就話公廁應該係出自專業設計師嘅手筆，一眼望落去美輪美奐，設備俱全、用料一流，但可惜廁所冇供水，地面就有積水，街坊撳沖水掣無反應，如廁後就惟有搵水喉清理，反映供水、沖水同去水呢三項公廁最基本嘅元素都搞唔掂，咁就算硬件設施全部都符合國際標準，都得物無所用喇。佢又話有街坊講，問題已經持續一段日子，跟住又慨嘆自己舊年失去咗荃灣區會嘅議席，惟有用其他渠道去跟進。言下之意，似乎係暗寸今屆嘅荃灣區議會唔做嘢喇。