政情：顏汶羽廁紙蛋糕慶母生日
生日梗係想食生日蛋糕同埋吹蠟燭許願o架喇！觀塘區議員顏汶羽尋日喺社交平台上載同爸爸媽媽嘅合照，原來係慶祝佢媽媽生日，但焦點就落咗喺個生日蛋糕度喎。點解？睇真啲，原來蛋糕嘅造型係一卷廁紙嚟！
朝早6點起身訂
顏汶羽喺貼文話「阿媽，唔好以為廁紙已經好難搶呀！要七點半排隊先買到」，原來「廁紙蛋糕」仲難買，事關網上訂購時就叫佢去分店買，分店又叫番佢去上網買。
咁究竟要喺啲乜嘢時間，先訂到個蛋糕呢？顏汶羽話佢要朝早六點起身上網訂，先可以買到呢卷食得嘅廁紙，大嘆仲難買過真廁紙。