中環出更：邵家輝呻延禁聚令 美容業界拍烏蠅
香港就快步入夏天，加上最近更出現本年首宗登革熱個案，蚊患問題再次受到關注。立法會食物安全及環境衞生事務委員會尋日討論防止蚊患嘅工作，但批發及零售界議員邵家輝就話有議員提到「蠓」，所以佢要提「烏蠅」喎。莫非烏蠅嘅問題都好嚴重，所以佢想一併討論？
原正討論蚊患議題
原來唔係喎，邵家輝係講緊政府早前實施嘅「禁聚令」同「停業令」，原本有效期至本周四，但政府尋日宣布會延長有關防疫禁令多十四日。邵就話政府搞到美容業界又冇得做生意、政府又唔賠錢，等於業界又要拍多十四日烏蠅。而相關措施係食物及衞生局負責嘅，亦都唔知會否再次延長。邵家輝根本係借題發揮，順便「呻兩句」，問食衞局副局長徐德義點防治烏蠅，但徐未答，邵就話「唔需要滅烏蠅啦，你交晒畀我哋得啦！」
邵家輝講完之後，有泛民主派議員覺得邵離題，繼而提規程問題。邵就話係唔需要提規程問題嘅，仲話自己都想走，跟住就離開咗會議室。唔知邵係太擔心業界，定係覺得政府決策出問題，所以先咁唔忿氣呢？
卓妮