中環出更：一家大細歎茶 李大壯：做足防疫措施
禁聚令下，平日燦爛嘅生活雖然要暫停，然而平淡中亦可搵到趣味。復活節假期期間。卓妮就喺中環置地廣場地庫，見到港台經濟文化合作協進會主席李大壯，一個人好休閒咁行商場。原來佢嘅老婆同囡囡去咗shopping，自己就周圍行吓睇吓當做運動。後來佢同家人會合，一齊去歎下午茶。雖然復活節假期係多咗人出街，不過佢話自己做足防疫措施，唔會擔心中招咁話。
李大壯仲話，儘管公司員工都奉行居家工作，不過自己總係覺得，成日困喺屋企都唔係咁好，因此周不時返吓公司處理吓文件，完成手頭工作就坐喺辦公室睇吓書。佢話以前工作繁忙，好難抽時間靜靜哋坐喺度睇書，依家就感到另一番味道。
林月萍多咗時間同家人相處
香港廣東青年總會副主席兼秘書長林月萍就領悟到，若果懂得欣賞平淡，都係一種福氣。佢話人其實唔需要太多嘢，呢段日子多咗時間同家人相處，自己嘅需求亦較以往簡單，差唔多兩個幾月先剪一次頭髮，連化妝都甚少，佢話疫境當中，心境不妨轉個角度嚟看待目前情況，仲話呢段時間多咗機會同外傭姐姐鑽研菜式，其實都幾開心o架。
獅子山青年商會領袖才能發展董事梁慧珊，就趁呢段時間約埋幾位老友一齊行山。由於平日甚少到郊野遠足，搞到自己有輕微中暑，幸好稍為休息就告無恙。
雖然因為體力問題，原本要行五個鐘嘅路程，最後要行咗八個鐘先至到達目的地，但佢話好彩冇中途退出，得以飽覽香港最美麗嘅郊野風景之外，又領悟到毅力同堅持，人生之中無論遇到邊一種境況，都唔好輕言放棄。
卓妮