政情：何秀蘭一保釋即去食魚蛋粉

前議員何秀蘭尋日喺薄扶林花園嘅寓所被警方拘捕，當晚就完成保釋，離開香港仔警署，佢事後仲擔心違反禁聚令，盡量避免四人同行，而且唔知係咪餓得太耐，佢保釋後嘅第一件事，竟然係走去食魚蛋粉！

何秀蘭尋日早上十一點被警方拘捕，去到夜晚十點先成功保釋，警署門口當時有七個人等緊佢，何步出警署離開，都盡量避免四人一齊行，分開幾批前後腳咁，可能係擔心又因此畀人抽秤啦。

應該係餓得太耐，一行八人隨即入咗香港仔東勝道嘅潮發記開餐，佢哋都有乖乖地分開兩張枱，各自嗌碗魚蛋粉餵飽自己個肚，期間都有不斷交頭接耳，又唔知計劃緊啲咩？