政情：紋眉不如減肥 林宇星做網紅
呢排大家留喺屋企抗疫悶悶地，多咗上網睇吓片，一班政界人士都紛紛加入網絡紅人行列。公民力量發言人林宇星都開咗個開頻道拍吓片。但喺芸芸嘅網紅當中如何突出自己呢？佢話與其紋眉，不如努力做運動減肥好過喇，分分鐘練出腹肌，咪即刻喺網上爆紅囉！
林宇星嘅第一條片就搵咗轉型做YouTuber嘅前深水埗區議員李梓敬一齊拍，仲講笑話覺得李梓敬條眉紋得靚過前離島區議員鄧家彪嗰條。對於男人紋眉呢股潮流，佢就唔多考慮嘞。佢話自從上年區議會選舉太忙太大壓力，搞到肥咗成五公斤。佢最希望就係減番個肚腩，至少着衫唔會現出嚟先。所以佢最近每晚只要十二點前做完嘢，都會去城門河畔跑步，仲會拉埋太太一齊跑，事關太太在家工作耐咗都肥咗少少，咪齊齊減肥囉！
至於拍片嘅話題，佢話唔使一窩蜂講同一個話題，而係提出帶多啲新嘅議題畀大家討論，就好似佢之前就曾經提議過可以考慮開放邊境禁區。