政情：避疫留家 王亞明享受煮飯仔
唔少港人都唔想宅在家，長假期一到必然四處遊玩，善德基金會副主席王亞明，往年都會趁復活節假期期間，到東南亞國家玩番幾日，然而今年就要留喺屋企度假喇，而上個月佢太太嘅冰島旅程因疫情而告吹，就好令人失望。
太太遊冰島告吹
王亞明話佢太太呢個為期十一日嘅冰島旅行團，早在舊年就開始策劃，後來冰島初傳疫情，佢太太除咗準備禦寒衣物外，亦準備口罩搓手液等防疫物品，又添置電水煲、方便飯同即食麵，打算自行煮食以避免幫襯當地餐館，意圖藉此將感染風險降到最低，而額外嘅糧食物資就需另外帶多一個旅行篋裝載。但最終都係人算不如天算，冰島方面鑑於疫情惡化實施入境限制，惟有疊埋心水留港避疫。王亞明又話，要疫情盡快受控，如無必要就出少日街。雖然近日佢同家人都深居簡出，一日三餐都靠自行下廚解決，但佢話炮製海參鮑魚等極花時間料理嘅食材，亦係居家避疫唔錯嘅活動。