政情：撥款受阻未過 竟問使剩幾多 羅致光寸鄺俊宇 唔做功課

因應本港多年來缺乏福利設施，導致各種服務輪候需時，政府就在去年二月財政預算案中建議撥款二百億元購置物業，作為提供地方營辦社會福利設施之用，以應付相關設施嚴重短缺的問題。羅致光仲喺同年六月十日出席福利事務委員會向議員簡介有關項目，並交代分布在全港約一百六十個擬置福利設施的資料。羅仲喺會上表示，如果相關撥款能夠喺同年七月獲財委會批准，當局最快可以喺今年首季開始購置首批物業。

立會遭破壞 積壓至今

不過，本港自去年六月爆發反修例示威衝突，立法會大樓設施更遭受嚴重破壞而停擺，導致有大量議案同撥款申請未及喺上年度休會前處理，一直積壓至今，當中就包括購置物業作福利用途呢項撥款申請。之但係，唔少議員好似唔記得咗呢回事，竟然喺最近舉行嘅特別財委會中提出書面質詢跟進購置物業嘅進度，搞到羅致光早前要發表網誌，暗寸議員提問前唔做好功課。

大搞拉布 市民有排等

羅致光喺網誌中，更不點名寸爆有議員問項目至今究竟使剩幾多錢添！翻查資料，提出呢個問題嘅議員原來就係身兼福利事務委員會主席嘅民主黨（白鴿黨）議員鄺俊宇，而鄺在去年六月十日會議中更擔任主持，理應非常了解呢個項目。羅致光在出任勞福局局長前曾經係白鴿黨嘅創黨成員，唔知鄺畀出晒名IQ（智商）高達一百六十嘅前黨友大寸，會有咩感受呢？

話時話，作為議員冇理由唔知道議會嘅議事時間好有限，若法案或撥款申請未能趕及喺今年七月中任期完結前獲得通過，咁呢啲同民生相關嘅項目就要推倒重來，喺下屆議會由零開始重新審議。面對現時黑暴及街頭抗爭不絕，議會內民主派又繼續大搞拉布，市民真係唔知要等到幾時，先可以用到呢啲社會福利設施喇！