中環出更：做過保險業 陸頌雄練大個膽
最近社交網站Facebook好興玩一個遊戲，就係列十項自己曾經做過嘅受薪工作，當中九樣係確實做過嘅，畀大家估吓究竟邊一樣係冇做過嘅，議員陸頌雄（Michael）尋日都嘗試玩呢個遊戲，吸引唔少網友熱烈討論。
Michael列出十項工作，包括攝影助理、跟車送貨、註冊護士學生、進修中心睇場、區議員、售貨員、送外賣、保險理財顧問、物業管理主任及議員助理等，結果網友嘅回應咩答案都有，睇嚟真係考起大家。Michael之後公布答案，原來係送外賣冇做過！佢仲話，其實自己做過好多暑期工，但都冇列到入去，好似派宣傳單張、快遞員等，但就冇送過外賣，而影響佢最大嘅就係做護士學生及保險理財顧問。
曾喺廣華做護士學生
Michael話，兩份工都做咗約兩年，都係關乎「人」嘅工作，當年喺廣華醫院做護士學生，係佢第一個實踐服務市民理想嘅職業，除咗護理工作，得閒都會到社區中心做義工，但同時又發現自己有不足嘅地方，所以未畢業就黯然離開護士行業。至於保險顧問就學識待人接物，說話技巧等，改變佢過去比較被動嘅性格。佢仲話，其實到依家做議員，都係用緊類似技巧，服務社區要膽大心細面皮厚喎。
卓妮