中環出更：撐美容院停業 張李施源：暴雨後有陽光
應政府要求，美容業由前日起停業十四天，咁啱呢一日亦係耶穌受難日，睇嚟呢一行嘅苦日子真係唔易捱。紫荊青年商會前會長張李施源（Fion）亦係業界中人，不過佢就好贊成今次停業嘅決定，認為與其優柔寡斷拖拖拉拉，不如狠下決心斬斷病毒傳播鏈，擺脫疫情重新出發。
Fion話今次疫情可怕之處，係潛伏期長，病毒感染者可以毫無症狀，令人防不勝防，所以好多行家招呼客人，都擔心對方是否隱形傳播者，若然一個唔好彩，日後爆出確診者曾幫襯過自己嘅消息，後果將會好麻煩。若果對阻截疫情嘅行動唔夠果斷，擔驚受怕咁營生嘅日子必然漫長，所以長痛就不如短痛啦！反正市面蕭條生意淡薄，咪當係放假休息吓囉。佢又話遇上逆境亦不妨樂觀面對，因為暴雨之後必有陽光。
鄭明明：業界自律 做足防疫
至於有「美容教母」之稱嘅鄭明明，就指禁聚令實施前，美容院已經門可羅雀，而呢段時間又要畀人工同舖租同其他開支，業界負擔之重可想而知。而佢自己嘅美容學校就由三月中開始到依家都暫停教學。儘管政府有資助方案，但金額唔多聊勝於無。佢又指業界都好自律，同客人量體溫、員工要佩戴口罩同消毒等措施做到足。而佢都有教吓客人喺屋企點樣護膚，使用家庭式美容儀器，等佢哋自己都可以保養吓。
西醫江正本就話，多咗客人喺停業令之前趕尾班車做美容，但一踏入十四天停業期，若經醫生診斷病人需接受美容療法的話，呢段期間就要暫停喇。雖然業界認為法例存在灰色地帶，不過佢話明白措施都係為市民健康着想啫。
卓妮