中環出更：何俊賢玩直播：今日未結婚

話說高佬賢整咗個節目，但聲稱因畫面太黑被批評得體無完膚。有網民就建議佢試吓啲主播燈，仲話燈光射光啲，就可以靚仔啲。

而高佬賢亦都不忘同網民互動，話「再靚仔落去，我難以想像後果」。點知引發網民追問佢有冇結婚，高佬賢就意圖瞞婚話「我今日未結」，搞到網民起哄話要介紹女仔畀佢添！

網民指何顏值巔峰已逝

不過高佬賢都係講吓笑啫，即刻同網民解釋話「你介紹好女仔畀我識的話，前幾年跟我結婚那個會找我麻煩，我最怕麻煩，不必要的麻煩，還是不找」。睇嚟高佬賢都係怕老婆嘅！但亦有網民「踢爆」佢，話佢早已喺一四年結婚，仲有網民「踩多兩腳」話「不要想太多，你顏值的巔峰早已遠去了！」網民咁樣講，莫非暗寸高佬賢嘅顏值問題不在燈光，而係早已隨時間逝去？

卓妮