政情：遠足「替身」執口罩 離地局長黃錦星又被寸做騷

擺背影相惹揶揄

新冠肺炎疫情仍未受控，政府呼籲市民要保持社交距離，唔好去人多擠迫嘅地方，所以唔少市民就選擇去郊遊行山，夠晒少人，仲可以呼吸吓新鮮空氣嘛！不過，愈嚟愈多人湧去行山，亦造成大量嘅郊野垃圾，甚至仲有人好冇公德心咁喺山上隨處拋棄口罩，變成播疫。

黃錦星尋日就喺Fb貼文，宣傳「同心抗疫，同行保育」，問網友有冇留意到郊野公園有新海報，宣傳郊遊行山人士要「同心抗疫」五個溫馨提示，同埋山野不留痕嘅概念，希望市民行山可以自己垃圾自己帶走，再附上幾幅行山嘅相片同植物特寫照。

有張相係橙衣人執口罩，網民即刻留言寸佢話「局長，小心呀，唔使你出手執口罩啊，你開句聲叫班細嘅做就得啦，唔好喺度做騷喇。」

企海報前當宣傳

黃亦即刻留言多謝番呢位網民嘅關心，話如果有誤會希望見諒，佢又解釋「細看相一橙衣人，應不似局長身形，但城中不少『有心人』愛惜郊野行動，值得show吓吧！重點，當然仍是呼籲山友遠足時『自己垃圾自己帶走』。」

咁佢喺邊？另一張企喺郊野公園海報前嘅藍衣人背影相咪係佢囉！之但係明明係佢呼籲市民要帶走垃圾，但就唔親自落手示範執垃圾，相反只係企喺塊海報牌前面，又點會有說服力？唔係做騷係做咩？

其實，黃錦星都唔係第一次畀人話做騷（口架）喇！佢之前都畀議員批評過Fb嘅貼文同上載嘅相「離地到離地」，事緣佢喺舊年十一月中喺Fb貼文講去咗大嶼山行山，仲上載咗幾張相，見佢一身「行山look」擺好晒Pose喺度硬銷走塑，點睇都似做騷，唔怪之得雖則橙衣人唔係佢，但因為佢做騷做到太深入人心，所以網民未睇清楚就認定係佢嘞！