中環出更:經歷搶廁紙潮 唐家威抗疫就住用

新冠肺炎疫情下,未必人人都有足夠嘅防疫物資,有機構尋日向弱勢社群派發口罩。查實近呢兩個月防疫物資嚴重短缺,甚至連廁紙都成為市民嘅搶購對象,有份籌辦活動嘅「里程同學會」會長唐家威(Grenade)話冇呢方面嘅擔心,因為屋企人負責中央採購,但佢話喺疫症期間用廁紙冇用得咁豪,仲要就住就住添!

Grenade話因應疫情都有減少社交接觸,但因工作關係,所以都有照樣外出,而屋企以往一個星期會有三、四晚家庭聚餐,但因應疫情依家要減少到一至兩星期先搞一次。佢又話原本計劃咗會同員工一齊去澳洲,亦有同家人去嘅泰國之旅,都因為疫情要取消。

開清潔公司 甄韋喬上下加辛

轉頭見到願景基金會主席甄韋喬(Mickey)同里程中心創辦人之一孔偉良同埋佢嘅太太。本身有開清潔公司嘅Mickey就話,疫情肆虐增加咗市民對清潔服務嘅需求,令公司上下人人「加辛」,不過就係辛苦嘅「辛」。佢話呢段時間嘅漂白水,以至口罩、手套同保護衣嘅使用量都大幅上升,同時要周圍撲保護裝備畀員工,所以開支增加咗唔少。

Mickey仲話喺疫情肆虐下,唔少員工都擔心外出用膳時會增加染病風險,所以近日佢公司就為喺寫字樓工作嘅員工包一餐中午飯,又推出咗彈性上班時間,方便員工避開返工人潮咁話喎。

里程中心另一創辦人劉杞民(Marvin)就話吸收咗當年沙士嘅經驗,每次入屋前都會先洗手。

講起唔少人擔心搭飛機會有高染病風險而選擇唔搭,Marvin講起喺○三年曾搭過一程機只有三名乘客,當時係要到台灣公幹,所以即使好驚都要照搭,但就唔夠膽喺機上除口罩食飛機餐嘞!

卓妮

第一手消息請下載on.cc東網iPhone/iPad/Android/Windows Phone Apps