新冠肺炎未受控，市民少咗出街，巴士乘客亦少咗，但議員田北辰尋日就鬧爆巴士班次嚴重脫班，簡直「離晒大譜」，仲批評運輸署監管不力，訂立嘅巴士班次指引形同虛設。又難怪佢咁嬲嘅，事關市民仲嬲，早前公務員就話可以在家工作啫，打工仔手停口停，返工遲大到博炒魷咩，運輸署署長陳美寶係咪揸車返工，唔使受等巴士之苦？之但係佢睇少眼，市民就等到腳軟，唔該佢睇緊啲喇！
