政情：陳百里派防疫用品派到冧枱
曾被議員炮轟經常去打卡嘅商務及經濟發展局副局長陳百里，儘管近日因疫情關係而少咗好多應酬，但仍有參與義務工作。尋日佢就應某珠寶集團之邀，喺深水埗向街坊派發防疫物資同飯盒。點知出咗意外。
好彩伸手攬得住
話說好多義工將防疫物資放上摺枱，陳都有埋枱幫手，誰知無耐摺枱突然「腳軟」冧咗，陳一時不知所措。好彩佢咁啱伸手攬住枱上嘅一大箱搓手液，先至冇搞到「一地都係」咋。
舉辦今次派發物資活動嘅集團行政總裁、仁愛堂前副主席陳賴楚惠就話，佢盤生意都蒙受疫情打擊，但鑑於好多街坊未必可以買到防疫用品，所以就決定除咗飯盒外，加碼送酒精搓手液同紙巾，為街坊打打氣咁話。