政情：立會受破壞感悲痛 梁君彥促加強保安
修例風波爆發至今九個月，立法會主席梁君彥喺年度事務報告撰文，對舊年立法會大樓遭反修例示威者大肆破壞深感悲痛。不過執勤中嘅秘書處職員並冇受傷，佢就感到欣慰。
立法會行政管理委員會尋日發表二○一八至一九年度事務報告，梁君彥形容上個年度係別具挑戰嘅一年，尤其係《逃犯條例》引起嘅社會動盪，並無因為政府宣布暫緩立法程序而平息，反而遭到示威者包圍同闖入，多個地方都受到嚴重破壞。
指用電量按年減0.91%
梁舉例話，大樓周邊一共有六十幾塊玻璃板損毀至無法修復，立法會會議廳、會議廳前廳同幾個會議室入面嘅會議設施，一啲具歷史價值嘅裝置都被毀壞，立法會圖書館正門成塊玻璃更被砸碎，而保安控制室、消防安全裝置同大樓四周嘅閉路電視，都遭到針對性嘅破壞。以致上個年度會期剩低嘅立法會同埋轄下委員會嘅所有會議需要取消。
因應大樓被示威者連番衝擊，梁君彥認為有必要加強大樓保安，所以亦委聘保安顧問就大樓嘅實體保安進行全面檢討。梁又提到，行管會已推行措施以改善設施同服務，例如將即時手語傳譯服務試驗計劃，由福利事務委員會推展至教育事務委員會。至於環保方面，梁君彥透露大樓內嘅用電量同用紙量，按年分別減少百分之零點九一同一成七。