政情：梁栢賢又發火 叫專家有錯要認
醫院管理局前行政總裁梁栢賢（PY）早前打破沉默，喺Facebook（Fb）呼籲專家同行對抗疫嘅批評唔好太政治化，否則引火自焚。相隔唔夠一個禮拜，佢再度喺Fb貼文話錯估疫情嘅專家要向市民坦承錯誤，唔好攞啲數字出嚟嚇人。連續兩次發聲，睇嚟佢係動真火。
錯判疫情應該退估
PY尋日喺Fb兩度貼文，先後話有好多專家不負責任，屢次錯估疫情，以為一句「疫情瞬息萬變」就可以自圓其說。佢話疫情變化無疑係好快，但如果估錯再估錯，咁就應該「退估」。單靠嚇人嘅數字嚟換取sound bite，做法並唔可取。相隔幾個鐘頭，佢再貼文話「疫情仍然嚴峻，請勿鬆懈！」
個Post出咗街之後，惹起網友熱議。有網友留言：「保守估計遠勝『假大空』！」另有網友話「人到無求品自高！唔介意大哥隱身，敬佩敢言發聲」，但有網友話「人到無求膽自大」，亦有網友話「人嚇人係冇藥醫」。
新冠肺炎全球爆發，有個別國家嘅確診數字大幅上升，香港嘅確診個案亦有增加，唔少專家評估疫情可能持續兩至三年，甚至唔會完結！眾說紛紜，到底邊個先啱呢？PY應該都察覺到呢個情況，睇唔過眼出聲嗌停，莫再斷估。