政情：助理出糧多咗一仙 陳梓維要向秘書處解畫
唔少區議員都會請助理幫手，而助理嘅人工可向區議會秘書處申請有上限嘅實報實銷，但油尖旺區議員陳梓維最近因為出多咗糧畀助理，搞到聽日要專登去秘書處填番份書面解釋。究竟點解出多咗糧？唔通佢做咗區議員之後好有錢？竟然出多咗一仙。
人工按分鐘計 出現9仙尾數
陳梓維尋日喺社交媒體玩直播，話同市民對話。期間佢同網民呻，話因為助理嘅人工係按分鐘計，結果份糧出現咗九仙嘅尾數，佢無辦法畀嗰九仙出嚟，所以就湊夠一毫畀助理，點知畀秘書處話佢出多咗糧，要佢填番份解釋。
呻完助理出糧，又呻好窮。佢話啱啱上任，秘書處未審批完佢日前提交嘅單據，所以要用自己份糧墊支辦事處嘅日常開支，包括兩個全職同兩個兼職助理嘅人工，搞到佢山窮水盡，仲話再咁落去，辦事處隨時斷水、斷電喎。