中環出更：疫情下更黐家 陳國民：人都健康咗
疫情陰霾下，唔少機構都實施員工在家辦公，好多人嘅生活模式難免要調整一下，不過身為老闆嘅香港中華廠商聯合會副會長陳國民，就話疫情對佢影響輕微，平日都係朝早瞓醒就準時返工，起居作息可謂一切依舊咁話。
雖然話如常上班，不過大家都減少聚會，出外應酬近乎零，晚上七、八點就完成歸途，返抵家門同屋企人食晚飯，共享家常風味。佢仲話收咗工之後嘅應酬大減，變相令到生活節奏趨於正常，笑言「都算係好事啩？」佢又話，唔知係咪近來多咗返屋企食住家飯，感覺上人都健康咗。
史昊洺留家研究工作
廠商會青委會副主席史昊洺，就認為香港嘅過年氣氛愈來愈淡，加上疫情持續嘅關係，最近都少咗外出，平日大部分時間都會留喺屋企做有關工作嘅研究。被問到係咪變咗宅男？佢就話偶爾會去朋友屋企飲杯嘢、傾吓偈或者出街食個飯，但表示每次活動結束，就會即刻返屋企，唔會喺街道逗留太耐。佢又話唔少人足不出戶都會覺得悶，希望疫情快啲過去，等市民可以有番啲嘢做啦！
香港善德基金會主席董吳玲玲話近來雖然深居簡出，但仍會保持做運動，早前佢就同家人到屯門咖啡灣漫步，仲大讚香港嘅自然景象都好靚，令人心曠神怡。佢話儘管大部分時間留喺屋企睇書，但始終需要出街行吓、呼吸吓新鮮空氣，強調每次出街都會做足預防措施，仲話「都係謹慎少少好啲嘅！」而佢個細仔董必政早前從英國返港，帶咗啲搓手液同口罩畀屋企人做手信。佢話本來都有做gym嘅意欲，可惜健身會所暫停開放，惟有留喺屋企，間中打吓機打發時間。
卓妮