中環出更：卓永興袋170萬鬆人 對話辦蘇州屎留政府
修例風波爆發至今逾九個月，政府舊年九月成立對話辦公室，協助構建對話平台，對話辦主任卓永興半年任期將屆滿，但就留低「蘇州屎」畀政府執手尾。
我哋日前向政策創新與統籌辦事處查詢有關對話辦過去六個月做過啲乜嘢？尋晚終獲回覆。創新辦話喺舊年九月廿六號喺灣仔新伊館舉行「社區對話」外，對話辦安排司局長同市民對話、交流同會議逾八十次。
特首同三位局長分別做咗四場Facebook（Fb）直播，總時間約二百七十分鐘，官方專頁嘅累積觀看人次合計約三十六萬八千九百人，透過媒體實時轉載收睇就約有廿七萬三千人。
講到做咗好多嘢 社會仍撕裂
對話辦主任仲參與咗舊年十一月起由政務司司長負責主持嘅「跨部門行動小組」，提供秘書處服務，協助司長監察同統籌有關政策局同部門，因應社會事件而須採取嘅應變行動、善後工作同發放消息等，亦參與咗十五次防疫抗疫等有關嘅跨部門會議。
講到好似做咗好多嘢，收視率又高咁喎，但唔見修補到社會撕裂，反修例衝突依家仍持續。任內嘅嘢未做完，但卓就袋一百七十萬元人工，仲有約滿酬金走人喎。
點解？創新辦話鑑於新冠肺炎疫情，原定喺二月到三月做嘅十六場深度對話同Fb直播需要押後，等疫情穩定後由政府其他單位繼續支援。咁講，意味住卓走人之後，留低啲「蘇州屎」畀政府執手尾，佢人工照袋，但由其他人做善後，佢就認真着數。
卓妮