政情：何啟明沙士冠名香港 失言拍片補鑊
話說立法會衞生事務委員會前日召開特別會議討論政府防疫措施，其中肺炎嘅名稱就成為議員爭拗焦點。勞工界議員何啟明質疑反對派議員將新冠病毒疫症稱為「武漢肺炎」係抹黑中國，仲反問「唔通沙士又要加番『香港』兩個字？」點知說話一出，何即遭網民鬧爆，相隔兩個鐘頭左右，就急急腳拍片耍冧，為言論致歉，希望可以平息爭議。
何啟明發表「沙士」言論後，即刻惹起網上熱議，有網民批評佢連源頭喺邊都搞唔清楚，亦有網友話多謝佢提醒大家沙士源頭係廣東省，就叫「廣東沙士」啦！唔知係咪睇到網民鬧爆，佢前晚十點幾喺社交網站上載短片，話對於開會時用咗一個唔恰當嘅例子，感到萬二分抱歉，又話「病毒無情，人間有愛」，希望港人喺呢個階段可以團結一致，齊心抗疫。
網民鬧爆冇腦冇常識
其實何拍片都係諗住息事寧人，但好多網友睇完短片之後仍然咬住佢唔放，仲留言鬧佢「冇腦」同「冇常識」。睇嚟呢次真係唔知點收科喇？事後再問番佢打算點拆局。佢就直認自己講多咗，勾起大家對沙士時期嘅回憶，話「錯就要企定」，惟有拍片同市民講對唔住啦！
認衰多口 向市民道歉
至於有網民指何嘅Facebook都用過「武漢肺炎」字眼，佢解釋，話當初新冠肺炎未有正式命名，依家已經冇再咁講啦；佢又提到之前去歐洲嘅時候，當地人見到黃皮膚嘅旅客都有所戒備，而當日佢喺會上嘅言論，只不過係想大家唔好再將新冠肺炎同中國掛鈎，但承認涉及沙士嘅言論係「講多咗」，就此向市民道歉，仲話現階段會繼續做番相關嘅防疫工作。
其實之前都有術數師話何啟明今年運程麻麻o架啦，話佢弱木命，今年庚子年，佢金旺水旺，做咩都唔順，奉勸佢做少啲，擔心佢吃力不討好喎，冇乜運行之餘，仲要小心刀傷利器，出行小心交通咁話，總之全年就平平無奇，唔合格！咁睇嚟，佢真係小心為妙嘞！