時值寒冬季節，入夜時分更感寒意倍增，小美相約公司一眾同事包括明哥及智叔等一同外出聚餐，歡度佳節。當大家排隊等待入餐廳期間，智叔突然打咗一個聲音響亮的噴嚏：「哈嗤！」明哥說：「嚇死我，智叔！你無嘢嘛？凍就着多件衫，使唔使我除件畀你？」智叔回答：「唔使，唔使，有人喺遠方思念緊我啫，我太受歡迎，無計。」
小美關心問：「智叔，你保重呀，一陣入去餐廳之後，我教你一個暖身嘅好方法。」智叔好奇：「咩好方法？」小美回答：「登登登櫈！就係飲酒暖身抗寒大法，我聽人講靠飲酒可以用來禦寒，有人話飲咗酒會覺得成身暖笠笠，個人無咁凍。」智叔說：「係喎，凍凍哋飲番啲酒，個人即刻㷫㷫哋，暖身一流，小美，都係你夠細心。」小美自滿地回應：「咁就當然啦！」
明哥嚴肅道：「錯、錯、錯，你兩個都錯晒，飲酒令人即時有發熱感覺，係因為酒精會擴張血管，但呢個只係一時假象。短暫溫暖之後，由於血管無法及時收縮，反而加快身體散熱速度，令人更加覺得凍。所以喺寒冷天氣過量飲酒反而可引起低溫症。仲有呀，智叔你前排先成功戒酒，畀小美講幾句又想飲番？」
智叔回答：「當然唔飲啦，我哋提倡無酒健康生活嘛，我都係附和吓小美啫，哈嗤！」明哥說：「咁就啱啦，酒就No啦，我有暖水，飲啲暖吓個身先啦，哈嗤！大鑊，畀你傳染咗！」
職業安全健康局
www.oshc.org.hk