政情：范國威執包袱 古董屏風不捨再賣
新民主同盟范國威（Gary）因為選舉呈請案於日前喪失立法會議席，冇咗議席嘅佢都要執拾立法會大樓內議員辦公室嘅物品，準備搬出。而Gary辦公室內有一個木製嘅古董屏風，佢話同呢個屏風好有緣分，事關佢喺三年前喺立法會換屆選舉落敗後，一度將屏風寄賣，去年立法會補選重返議會，又將個屏風帶返嚟。佢直言經此一役後唔捨得再賣個屏風喇，不過就諗緊放喺邊好。依家有屏風，但就冇咗議席，唔通魚與熊掌真係不可兼得？
議助出路堪憂
Gary話，個屏風係購自灣仔一間古董店，當年落敗時就放喺同一間舖寄賣，當時老闆亦願意接收，兩年後佢重返議會，再去該古董店時發現屏風未賣出，所以就再將屏風帶返辦事處，覺得有種失而復得嘅感覺喎。而佢辦事處仲有唔少木製品、小模型擺設、畫作、CD同漫畫，部分會拎番屋企，有啲就放喺迷你倉。佢又話，原本諗住帶啲漫畫同CD到辦公室，可以用嚟減壓，但之前議會工作太忙，所以都冇乜點睇漫畫。而佢最擔心嘅並非物品點處置，而係議助嘅出路咁話。