- on.cc 東網主頁
- 5月11日 (日)
本港示威動亂持續至今達半年，政府一直被各方批評「後知後覺」、未有回應民間訴求。尋日政府就喺社交網站上公布，多位局長將會就各自嘅政策範疇喺網上平台玩網上直播，而首輪做直播嘅就有商務及經濟發展局局長邱騰華，仲有勞工及福利局局長羅致光。政府尋日公布完新一份貧窮情況報告後，羅就被質疑扶貧不力，唔知道羅喺社交平台「開播」時，會唔會惹嚟一眾網民向其「開波」呢？
商經局社交網站顯示，邱騰華將於周二晚上八時喺社交網站做直播，講明同大家傾經濟，屆時仲會回應網民留言。但勞福局就暫時仲未公布有關詳情。對於解決本港貧窮問題，政府一直都被質疑愈扶愈貧，新一份報告貧窮情況中，不論係貧窮人口定貧窮比率都創歷史新高，相信出名IQ高嘅羅認真都要諗吓直播時點樣面對網民喇。
而社會福利界立法會議員邵家臻（阿臻）尋日更直指羅致光言論長期離地，只係識玩弄語言同智慧，仲話羅就算唔使開live（直播），都影響咗好多人嘅life（生活）。阿臻預計，羅做直播時候會有好多市民「招呼」佢，唔知到時啲「嬲嬲」會多到遮住羅嘅鼻定眼眉咁話。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
