政情：社會市道差 陳雅輝：難捱過九七金融風暴
呢幾個月社會動盪，好多市民都怕咗出街。香港中西區女企業家協會早前舉行創會暨首屆就職典禮，副會長陳雅輝（Annie）都有一番體會，話從事地產代理工作四十年，九七金融風暴已夠難忘，但都唔夠最近本港呢場社會運動遇到嘅挑戰咁辛苦，因九七年輸嘅只係金錢，但近期擔心嘅仲有精神上嘅困擾同人身安全問題，連講嘢都要望清楚前前後後，好驚講錯嘢咁話。
被問到點先係成功創業家，Annie就話，唔止要兼顧工作同家庭，仲要關心社會、熱心慈善。而有幾十項公職在身嘅佢又話，時間要分配得好啲，同埋最緊要係有屋企人支持，大家要分工合作喎。
嚴偉貞：唔再係飲吓茶就有生意
至於會長嚴偉貞就話，自己識到好多女企業家，學習佢哋嘅優點亦係成功條件，而呢個都係佢成立協會嘅原因，嚟緊佢會搵啲成功女企業家，希望大家互相交流吓。而喺金融業打滾咗四十一年嘅佢，主要做證券交易，佢大嘆近排環境差，經濟唔好，係佢做金融咁耐比較「唔好做」嘅時候。佢又話，以前同客人飲吓茶，傾吓偈就已經有生意做，依家係冇可能，相信新年過後市道更慘淡喇。
高燕芬：只要係貨真價實就好好
另一副會長、喺傢俬行業打拚四十年嘅高燕芬認為，只要係貨真價實，畀到服務個社會已經好好，又話依家國內傢俬行業興盛，但材料未回復標準。而佢嘅集團就曾獲中國誠信獎項，亦係本港唯一一間獲紅Q嘜家居產品安全健康標準認證嘅家具公司，會免費幫手驗甲醛同揮發性有機化學物，直言希望建造健康耐用、歷久常新嘅傢俬畀客人用咁話。
卓妮