政情：港鐵劉天成李家潤 有職齊齊升

李要向劉匯報工作

港鐵尋日宣布委任劉天成為常務總監—車務及中國內地業務，為期兩年；而李家潤則接任車務總監一職，為期三年，佢哋將喺明年一月一日履新。港鐵話劉天成履行常務總監後，將負責管理同監督香港鐵路業務、內地鐵路及物業業務，以及監督全球鐵路營運標準及促進港鐵喺各地最佳作業模式嘅分享及交流，而劉天成將繼續擔任執行總監會成員，直接向港鐵行政總裁金澤培匯報，至於李家潤接任車務總監後，將管理香港鐵路營運，並成為執行總監會成員，直接向劉天成匯報。

劉天成現年六十歲，喺八二年加入港鐵，曾擔任多個管理職位，包括深圳四號線總經理、車務營運副總監同昂坪360有限公司董事局主席等，一六年五月，佢獲委任為車務總監及執行總監會成員，而佢擔任車務總監一職期間，曾處理多項大型鐵路項目同事故，包括南港島線通車、廣深港高鐵香港段落成、港鐵四線故障同今年三月十八日港鐵兩列列車相撞事故等。