政情：會計師公會一人一票選會長 江智蛟：唔係一時三刻做到

新上任嘅會計師公會會長江智蛟預計出年業界挑戰頗大，但會以平常心面對。長遠計劃方面，佢希望可以提升公會嘅專業形象，事關會計師成日畀人嘅印象係工時長但人工都唔高，所以想透過搞吓活動，帶啲正面訊息畀公眾。

關於一人一票選會長方面，江就話唔係一時三刻嘅事，佢哋已經開始進行諮詢。至於有會員希望公會可以多啲就社會議題發聲，佢話公會以會計行業發展同會員福利為依歸，會保持政治中立喎。

改革派喺理事會入面唔過半

連任嘅改革派理事李健恆覺得會長同副會長偏向保守派，但即使係咁都唔可以忽略年輕會計師嘅聲音。佢話會員入面有七成係非執業會計師，三成執業會計師，但資源往往傾斜向嗰三成人度，佢目標將資源公平啲分配。

張煒麟都係最後生嘅理事，佢話改革派喺理事會入面大約佔五分之二，都係唔過半。另外一位改革派理事馮領業話改革派有六人參選理事會，全數當選，佢話年輕會計師都偏向民主派，希望公會可以為公義或者社會議題發表聲明。