政情：公民講場：象哥為購物城呼冤 開業撞正經濟低潮

鄰近落馬洲邊境嘅新田購物城喺八月靜靜雞逐步退場，項目嘅牽頭人、進出口界立法會議員黃定光（象哥）大呻「時不與我」。喺去年二月先開業嘅新田購物城好似「生壞命」咁，先係遇上中央收緊個人遊政策減少咗內地訪港旅客數量，近期反修例示威活動不斷更加重創本港旅遊業，冇人嚟買嘢又難免要執笠嘅。之不過，其實新田購物城呢個項目已經講咗好多年，甚至早喺二○一五年九月已經獲得城規會批出臨時規劃許可，但籌備咗近二年半先開到業，錯過晒內地旅客嚟香港購物嘅高峰期，可以講係「蘇州過後無艇搭」喇！