政情：選舉落敗 周浩鼎或做番律師
今屆區議會選舉中有唔少雙料議員落敗，其中喺離島區「東涌南」選區落選嘅民建聯周浩鼎（Holden），本身係循俗稱「超級區議會」嘅功能界別區議會（第二）參選並當選，佢就話未諗立法會議席嘅問題，仲話自己有專業資格，可以做番律師。
仍服務東涌 未諗立會議席
Holden就話今次雖然輸咗，但依然會喺東涌服務。至於立法會議席方面，佢就話依家仲係好遙遠，暫時未有安排住。佢仲補充，話即使唔做立法會議員，作為民建聯領導層都可以為香港服務喎。咁班議助又點呢？佢就話牽涉人數唔多，依家仲安排緊，細節就未傾好。
對於徒弟嘅前路，作為師傅嘅進出口界黃定光（象哥）就講到明「返唔到轉頭」。象哥解釋，話當年Holden決定要出大海，已經講過返唔到轉頭，因為要循進出口界出選嘅話，要顧及公眾同業界嘅睇法。佢仲透露，香港中華出入口商會過去已經搵緊接班人，依家仲同緊業界商討。言下之意，相信Holden出選進出口界嘅機會都好微吓喎。