政情：麥嘉晉籲關心理大被困者
理工大學爆發激烈衝突後，依家仍有部分示威者留喺校園唔肯離開。身兼工業貿易諮詢委員會委員嘅麥嘉晉（Raymond）日前亦到過理大，見過校內嘅惡劣環境，佢日前喺Facebook（Fb）貼文，話希望社會能多啲關注曾經或仍然喺「理大圍城」中的學生，因為佢哋喺心理上所經歷嘅折磨同傷痛，好可能係終身嘅。
曾出席建構對話平台會議
身兼兒童事務委員會委員嘅黃梓謙（Gary）都入過理大，事後喺Fb貼文話一直關心兒童嘅福祉同人身安全，點知入完理大後，見到好多未成年人唔單止參與社會運動，唔少喺過程中被捕，佢仲自爆被人嘲為「冷氣軍師」。其實Raymond嗰晚係同Gary一齊入理大接啲學生離開，佢亦喺Fb貼文話「哪管閒言閒語，當晚進入理大，大家只求站在同一陣線，確保學生安全。」佢仲希望社會大眾多啲關心呢班學生。
其實，Raymond同Gary都曾係民主思路嘅成員，而Raymond喺八月亦獲政府邀請到禮賓府出席「如何建構對話平台」會議，係會議當中最年輕嘅成員，當時佢亦要求政府回應訴求同埋要建立對話平台等等。
咁到底進入理大校園惹起過乜嘢閒言閒語？Raymond冇透露半句。至於修例風波幾時結束，佢形容呢場似魔咒般嘅政治風暴已近半年，暫時仍睇唔到盡頭，但佢相信香港人，能夠喺歷盡劫難後，涅槃重生。