政情：泛民拉布無止境 司法委員會主席又選唔出
立法會開波個幾月，好多事務委員會都已經按議程傾緊實質嘅項目，但立法會司法及法律事務委員會尋日召開第三次會議，都仲係選緊正副主席，泛民主派一直玩拉布，搞到要休會，跟住仲拋咗個質詢方案出嚟，但最後都係選唔到主席。
根據上兩次會議嘅結果，總共有九位議員被提名做主席，泛民議員話既然主席候選人唔多，不如畀每位候選人多啲時間闡述自己政綱同埋畀其他議員質詢啦。因為議員對發言時間長短同質詢方法有唔同意見，代副主席郭榮鏗主持會議嘅議員涂謹申就決定休會二十分鐘研究吓用邊個方案畀議員質詢好。
被斥放任泛民自由發揮
休會後，涂就拎咗兩個方案出嚟，擺明係都用嚟拉布o架喇！跟住議員陳志全就提出，如果有議員問「地圖炮」點算呀？好似問「如果逃犯條例再嚟一次，議員會唔會支持？」建制派議員梁美芬聽完就好似唔太滿意喇，即刻提出規程問題，質疑陳舉嘅例子係咪假設性問題？會唔會有針對成分？又話涂放任啲泛民議員喺度自由發揮。涂就話一切都係假設性問題，就好似問「主席，你眼唔眼瞓呀」一樣，陳之後都回應番係假設性問題，又話無諗過有議員理解能力咁低。擺明寸梁美芬喇！