政情：陳嘉賢度身訂造旗袍 着完變博物館永久館藏
女士出席隆重場合，唔想遇上「撞衫」嘅尷尬場面，最好就梗係自己做一套獨一無二嘅衫啦！香港青年工業家協會前副主席陳嘉賢（Karen），就曾經為咗上台領獎，專門訂造一件旗袍，而件旗袍着完之後，仲成為博物館嘅展品添，確係威水。
早前喺一個活動上見到Karen同香港青年工業家協會秘書長莫慕潔，Karen話自己首次着旗袍，係結婚嘅大喜日子，而第二次着旗袍，就係前年嘅「傑出專業女性及女企業家選舉」，由此可見佢係幾咁重視呢個獎項。為隆重其事，着上台領獎嘅旗袍當然要與別不同，於是佢就想到將公司產品上嘅牡丹花圖案，印落旗袍布料上面，視覺效果相當出眾，更成為頒獎禮當晚嘅焦點所在。
開發周邊產品 首飾披肩香水
有份為Karen設計旗袍同產品圖案嘅著名設計師余嫿，因受邀參與杭州絲綢博物館嘅旗袍展覽，從而情商Karen畀頒獎禮所着嘅旗袍參展，後來更成為博物館嘅永久館藏。Karen目前唔單止專注本業，亦有涉足旗袍業務，並以此為主軸，開發配搭旗袍嘅周邊產品如首飾、披肩同香水，既做生意又推動跨界別嘅設計文化咁話。