中環出更：「塑」造新機遇 廖錦興：用技術解決環境問題
香港青年工業家協會暨基金會日前換屆，原為該會常務副會長嘅廖錦興接替冼雅恩擔任新一屆會長，而該會今次嘅就職晚會就以「塑造新機遇」為主題。廖就話，因自己係經營塑膠業嘅關係，所以就特別鍾意「塑」呢個字，就職晚會主題亦有「塑」字，真係三句不離本行。
成長於公共屋邨嘅廖錦興曾經要穿膠花幫補家計，年紀小小就不乏接觸塑膠嘅機會。雖然人手穿膠花呢種外發工作已被時代巨輪淘汰，但佢就話，早期嘅香港工業全靠塑膠先至賺取第一桶金，可以話係經濟發展嘅基石喎。對於近年因為講求環保，人人都話減「塑」，廖就認為塑膠應用範圍非常廣泛，由家庭用品以至航天科技都係不可缺少，而為人詬病嘅其實只係用完即棄嘅塑膠用品，只要借助生物降解技術，應該可以解決呢啲塑膠用品所帶來嘅環境問題咁話。
江浩榗：矽膠洗乾淨先可以回收
協會執行委員江浩榗因經營廚具生意，亦都經常接觸塑膠以外嘅另一種膠，就係矽膠喇。佢話矽膠同塑膠一樣可循環再造，但前提係要處理乾淨，先至可以做到分類回收，可惜港人唔多注重物件回收前嘅清理工作，以致影響循環再造嘅效果。
自動化係工業發展大趨勢，同樣係協會執委嘅林朗熙，早前就喺以色列引進多用途機械人，唔止可監測空氣同溫度，仲可以應用於零售業，甚至可以照顧長者。
林朗熙擬引入以色列機械人
對於有人擔心自動化會威脅到打工仔嘅飯碗，林就認為職位嘅多寡主要取決於巿場需求，工商業都採用科技，無疑會令到某啲工種消失，但亦都會衍生另一種專業，例如資訊科技未出現之前，冇人諗過程式編寫員呢種職業會大行其道，所以科技只係影響到工種嘅轉變，並非取代職位，毋須過慮喎。
卓妮