政情：泛民建制鬥拉布 累船運成本提高
自立法會復會後，泛民主派就喺內務委員會上拉布，而建制派就喺立法會大會上積極發言。尋日就有兩條有關大鵬灣領港服務嘅條例結束審議期限，但因為兩派大鬥法嘅情況下，搞到業界冇得發聲。嚟緊船公司喺條例生效後，就需要再額外畀領港費，搞到航運成本增加。
領港條例審議期 未能延展
話說喺本周立法會會議，一共有七位議員計劃申請延展，牽涉嘅至少都有七條附屬法例，全部嘅審議期限都係前日屆滿，而且均屬「先訂立、後審議」方式，喺立法會設小組委員會審議。其中航運交通界易志明唔止為《2019年領港（費用）（修訂）令》、同埋《2019年領港條例（修訂附表2）公告》申請延展，仲有提出埋修訂添！
有關條例係喺大鵬灣增加三個領港員登船區同埋相關嘅領港費，易志明就話有業界認為條例通過後，變相船公司有需要經大鵬灣時，都需要聘請領航員，會搞到成本太高，擔心會令到有船公司選擇唔嚟香港，所以希望透過延展審議期限再同政府傾。
明年元旦生效 領港費增加
由於依家內會未回復正常，開唔到小組委員會之餘，仲因為拉布而申請唔到延展，所以條例喺冇審議下會喺明年一月一日生效。過去有法例亦都試過因為拉布，最終小組委員會申請唔到延展，搞到政府嘅修訂無法處理。有迹可尋，若兩派仲繼續大鬥法，最終受苦嘅咪又係小市民。