立法會議員尋日同十八區區議會正、副主席舉行午宴，喺大樓宴會廳筵開六席，據聞大家都係風花雪月居多，冇乜正經議題同唇槍舌劍。
不過，去到上炒飯炒麵嘅環節時，就發生咗一段騎呢小插曲，新民黨主席葉劉淑儀忽然彈起身攞起杯紅酒，然後逐張枱、逐位正、副主席向佢哋祝酒致意，好似佢做主人家嫁女擺酒多謝親友畀面光臨咁款。
在席嘅其他建制派立會議員見到葉劉咁做，開頭都Ｏ晒嘴或者私下偷笑，但諗諗吓就覺得唔對路。隨後民建聯主席譚耀宗、C18召集人林大輝，以及工聯會王國興，都先後有樣學樣排晒隊祝酒，非常搞笑，而對於呢班平時被立法會忽略嘅正、副主席來說，真係受寵若驚。
有泛民主派議員事後解讀，新一屆特首選舉委員會將新增百多個區議員議席，係人都知葉劉好想選特首，自然要向各區區議會領導拜定票先，就算最後選唔成特首，對之後選立法會都百利而無一害。其他建制派頭頭為免蝕章，就算明知戇居都只有照跟啦！