政情：葉劉斥尸位素餐大學校長中箭
呢五個多月以嚟，暴力示威行動不斷，而喺衝突中被捕嘅有唔少係年輕人，當中包括咗大學生同大專生，有說法指本港喺呢場修訂《逃犯條例》風波中損失咗一代人。身兼行政會議成員嘅立法會議員葉劉淑儀（葉劉）直言情況令人震驚，仲話作為納稅人，不禁要問一句，班大學校長咁多年嚟，喺培養學生品格方面到底做過啲乜嘢？點解大學竟然變成暴力嘅溫床？直斥各大學校長係尸位素餐。
人工比林鄭更高一倍
喺呢場修例風波當中，可以見到被捕人士中有唔少年輕面孔。早前亦都報道過，喺修例風波中被捕嘅逾三千人中，有逾七百人係大學生同大專生，而喺本地大學當中，香港理工大學最多人被捕、其次係香港中文大學，之後就係香港大學同香港浸會大學。而大部分學生就分別涉非法集結、暴動、縱火、刑事毀壞同襲警等。
前晚葉劉喺社交網站發貼文，仲羅列二○一六至一七年八間資助大學校長薪酬，最低薪係嶺南大學校長鄭國漢，為四百六十五萬至四百八十萬元；最高就係時任理大校長唐偉章，達七百六十五萬至七百八十萬元，直指大學校長福利薪酬高到令人咋舌，甚至比特首薪金高出一倍或以上。
偏袒暴力學生阻執法
葉劉又話，一直有傳聞指大學校園內藏有軍火庫，甚至有製造炸彈的工場，但喺呢啲暴力分子壓力下，部分大學校長竟採取姑息態度， 協助佢哋阻止警方進入校園執法，仲特別提到呢兩日警方同中大學生喺校園出口二號橋位置發生嘅衝突添！佢認為學校根本冇合法理據阻止警方進入校園執法，但校長就選擇偏袒暴力學生，實屬非常不當咁話。
佢又提到部分人只視大學校長呢個職位為仕途上踏腳石，以港大前校長馬斐森為例，因港大喺世界上躋身前列，故此馬斐森離港後，就可以成功轉職到英國著名嘅愛丁堡大學出任高層喇。不過，佢都認為政府亦係責無旁貸，皆因回顧回歸以來歷任教育局局長，好多均冇學術背景，所以就冇足夠學術地位或知識同大學校長周旋，結果就造成現今放任自流嘅局面喎。今次葉劉一支箭射晒八大校長，但係唔係人人都認同佢所講嘅就唔知喇。