政情：民主派咬實唔放 要求內會譴責陳維安
立法會內務委員會喺民主派議員拉布下，上月復會至今仍未選出正、副主席，立法會秘書長陳維安（Kenneth）更被「擺上枱」，被民主派要求到會上就唔同事宜解畫，疑似想拖延時間，但就遭Kenneth拒絕。點知有民主派咬住Kenneth唔放，話要求喺內會會議上討論內會譴責Kenneth事宜。不過內會上年度主席李慧琼尋日已覆信，指佢嘅職權主要關乎新會期正、副主席選舉，選到之前內會唔能夠處理要由內會作決定嘅事務咁話。
指涉疏忽職守 無視議員要求
去信提出譴責Kenneth嘅係民主派議員毛孟靜（毛婆）。毛婆就話，五月時已有議員對Kenneth處理有關《逃犯條例》修訂嘅法案委員會事宜上疑違背政治中立，到十月議員要求佢列席內會交代立法會大樓保安事務等又多次缺席，甚至有議員去Kenneth辦公室時亦未能會見，直指Kenneth涉嫌疏忽職守，無視議員要求，所以提出譴責Kenneth。
其實未有李慧琼覆信之前，Kenneth早已回覆過議員，其出席會議需得到立法會行政管理委員會授權，而佢因為冇得到批准，所以唔能夠出席。而要行管會批准，首先要選出行管會當然委員、即內會主席先。毛婆係咪借啲意拉布，相信都好清楚喇！