中環出更：波哥嫌政府文宣傳統 無助解決亂局
近月香港社會氣氛低迷，社會上有唔少文宣批評政府工作，有時政府都會喺社交媒體上有澄清，至於成效係點，相信大家都有目共睹。近年喺Facebook（Fb）上好活躍嘅立法會保險界陳健波（波哥），尋日批評政府嘅文宣做得傳統，無助解決社會亂局，而政務司司長張建宗都承認有不足，仲大讚波哥好成功，話佢嘅Fb專頁做得好。既然識得讚人，唔知張建宗會唔會打算向波哥取經呢？
波哥喺立法會上提到暴亂其中一個最重要嘅根源，係因為有人大量製造極有感染力嘅文宣，當中包括美化暴力同埋煽動仇警。佢認為唔少人誤信呢啲文宣，所以對社會產生大量仇恨同憤怒，但喺面對咁強勁嘅國際級文宣時，政府只係以傳統方法去回應，鬧爆「完全幫唔到件事」，認為應該要釜底抽薪，從根源去糾正。
張建宗認做得不足
張建宗回應時就批評假新聞無日無之，充斥每日嘅生活，仲話「真係假假真真、真真假假、是是非非，真係好難去判斷」。佢亦承認做得不足，話一查到係事實，就即刻喺不同途徑澄清，而近排仲陸續用社交媒體去做。佢又希望市民可以明辨是非，唔好不分皂白，要求市民都要同朋友澄清番事實喎。
卓妮