中環出更：嚴志明小時想做 巴士售票員 鬥木佬
細個時寫「我的志願」，你會講自己將來想做乜？卓妮早前出席一個創意展嘅閉幕典禮，就見到香港設計中心董事會主席嚴志明，問佢細個有冇諗過長大後做乜嘢呀？或者從事邊個行業？佢竟然話細個時有過兩個志願，同依家做嘅完全唔同，一係做巴士售票員，另一個就係做「鬥木佬」！
點解呢？佢話細嗰陣無得成日旅行，外出搭巴士就好開心，每次見到車尾位置有個閘，覺得好好玩，售票員又會係嗰度拉吓閘，扶吓老人家、小朋友上落，好有人情味咁話，而佢返到屋企又會拉吓閘、模仿吓，覺得好好玩就好想自己係個售票員。之後又因為屋企細，家人成日坐喺佢個碌架床位置，於是佢就好想做木匠，整幾張櫈畀佢哋，等佢哋唔好再霸佔佢張床咁話。
黃炳培暈車浪 行路返屋企
本地著名視覺藝術家「又一山人」黃炳培係展覽主角，而佢嘅老師、人稱「設計之父」本地著名設計大師靳埭強都有嚟捧場。問黃炳培係咪由細到大都想做藝術同設計？佢就話細個身體差，搭車都會暈車浪，連中小學都喺黃大仙，要行路返屋企，學校旅行都去唔到o架，好彩中二之後開始有地鐵，先可以衝出黃大仙，大個之後仲有緣幫地鐵做咗好多廣告同宣傳片段添！而佢喺讀書時期都經常幫手設計壁報同宣傳活動等，都同設計結下不解之緣。
「丑生王」梁醒波個孫梁智宏就話細個好鍾意練寫字，連自己個名都會練到靚為止，畢業後喺廣告公司做設計工作，所以好多嘢都會睇得比較細緻，同追求美，直到依家做生意都係，品牌設計、包裝到零售都會參與，會花好多心思喺設計上，希望呈現靚嘅嘢畀大家，仲話佢嘅生活真係走唔開設計o架！
卓妮