政情：八網難逃：台式楊桃燉瘦肉湯 吳國安讚配搭夠特別
台灣冬季水果節特賣會又嚟喇，立法會工業界議員吳永嘉同香港中華廠商聯合會副會長吳國安（安哥）日前出席咗品嘗會，食咗唔少新品種嘅水果，仲飲咗個特別嘅湯水，乜嘢嚟？係楊桃燉瘦肉湯，安哥話飲落少少酸，功效係下火喎。
台北經濟文化辦事處駐港代理處長高銘村同台北貿易中心巫英臣都有出席呢個特賣會，一齊推介新品種嘅水果。安哥話台灣今年冇乜打風，所以水果好豐收，仲有新品種，例如「椪柑」，比一般嘅柑多汁，而紅肉火龍果亦特別甜。
至於楊桃燉瘦肉湯，佢話好少見湯水嘅用料係咁配搭嘅，都係好特別。問起會唔會返屋企燉嚟飲，佢就話平時好難搵到楊桃o架！
有關機構話今次有十三種空運到港嘅台灣水果，主推係「椪柑」，因為椪柑係銷售金額第二高嘅果品，今年又生得特別好。