政情：邵家輝被抽秤字眼 寸毛孟靜唔尊重國家

「國內」兩字惹爭拗

話說政府尋日喺一個事務委員會上，講起港珠澳大橋會批多五千個本港牌照同五百個內地牌照，邵家輝就提到特區同國內會多咗五千架車。本來係一句好簡單嘅說話，但議會陣線毛孟靜就要提醒一下邵家輝，唔好順口就講國內，咁樣係非常政治不正確，因為邵唔喺國外，香港係中國嘅一部分。

邵家輝就話毛孟靜嘅發言提及自己個名，要求回應。事務委員會主席鍾國斌就話「快快趣趣啦」。邵家輝發言時就寸番毛孟靜，「如果你心同口都真心尊重國家就好啦！」毛孟靜亦即時提規程問題，話邵家輝冇澄清自己講嘅嘢，同時話自己根本冇講錯，香港唔喺中國國外，堅持話邵家輝政治不正確。之不過，因為到咗下一環節，件事就不了了之嘞！