政情：司法委員會選主席拉布 何君堯斥泛民飯桶
司法及法律事務委員會尋日召開第二次會議選舉正副主席，泛民議員又拉布，議員何君堯仲同泛民互寸駁火，泛民寸何君堯係黑社會，何君堯話番佢哋係飯桶。最後搞咗個幾兩個鐘，正副主席都係選唔成，唔通真係會好似議員張華峰咁講：「今年度結束，司法選唔到！」
泛民議員喺會議上提名咗多個唔在席嘅議員，話已得到對方同意，建制派蔣麗芸擔心議員之間有乜嘢誤會，驚最後又要重新選過好麻煩。主持郭榮鏗就暫停會議，叫秘書核實吓啲議員嘅意願，但就搵唔到啲唔在席嘅議員。
許智峯反嘲黑社會
何君堯話已睇咗泛民表演好耐，選正副主席頂多半個鐘至一個鐘就搞掂，指郭及其黨羽嘅行為不可恭維，又將泛民統稱為「飯桶」，叫佢哋要人尊重，首先唔好侮辱自己。佢又提到莫乃光喺七月一號同外國記者講警察佔領了「Parliament（國會）」係講大話，話泛民跟住劇本做戲都算啦，但啲戲真係好屎囉！
對於許智峯話何係黑社會，何質疑泛民點知邊個係黑社會，又叫許唔好咁厚面皮，如果咁有節氣，不如去辭職，又話自己何止執業律師，仲掃葉添，清潔香港吖嘛！
何講完就走咗，莫乃光澄清佢係喺六月十二號講，同埋咁講係希望英國記者可易啲代入；許智峯就話辨別到七‧二一無差別攻擊市民嘅白衣人係黑社會，而同佢哋握手嘅人都係。