政情：委員會選完主席 建制又爆退會潮

工務小組成重災區

成為退會重災區嘅工務小組委員會，之前選副主席曾出現小插曲，當時建制竟然提名莫乃光，擺明係放過位畀佢，但泛民竟提名議會陣線嘅朱凱廸，建制亦提名何俊賢攔截，好彩莫乃光最後都連任副主席。

但係選完正副主席後，唔單止吳永嘉、潘兆平、陳振英、廖長江退會，謝偉俊、何俊賢、蔣麗芸、姚思榮、林健鋒等就好似約好咁，喺上星期四、五同尋日，先後因調整工作為理由退出，令委員會委員跌至四十二人，雖然大批建制派議員退出，但工務小組委員會剩低嘅委員，建制派仍佔咗近七成共二十八人，繼續穩佔人數優勢。

第二個重災區係房屋事務委員會，雖然嚟緊要處理唔少爭議議題，但都有五人退會，包括潘兆平、陳振英、張宇人、廖長江，連工聯會黃國健都走埋添！

至於發展事務委員會，泛民喺選主席時都試過拉布，曾經出現有十名議員被提名嘅情況，搞咗一大輪先選出建築、測量、都市規劃及園境界謝偉銓做主席，勞工界議員陸頌雄做副主席，點知一選完，潘兆平、陳振英、進出口界黃定光同勞工界何啟明就快速走人，齊齊退會。

民政事務委員會都不相伯仲，張宇人、廖長江、潘兆平同陳振英似乎閃得就閃，統統都話工作調動關係功成身退。商界林健鋒同蔣麗芸都唔執輸，一齊飛起交通事務委員會。一日內咁多議員退會，真係嚇親人，不過之後可能都會陸續有嚟，我哋拭目以待。

莫乃光逾期申入會

正當好多議員退會之際，點知資訊科技界莫乃光竟然逾期申請加入議會聯絡小組委員會，話係重整公務工作優次後嘅決定。問番佢點解會有咁嘅諗法，佢就話因為過去參與過唔少外國議會聯絡工作，但任期開始時又冇加入到，如果依家可以加入，可以更早得知外國議會到訪資料，對安排工作比較方便咁話。