政情：梁美芬發言頻甩轆 「闊斧」變「潑婦」
打工仔都要交稅，所以都會好關注稅務問題。立法會尋日開會討論《2019年稅務（修訂）（稅務寬免）條例草案》，好多議員都爭相發言，但係議員梁美芬就唔知點解頻頻甩轆，仲話人「潑婦」喎，究竟係邊個激親佢呢？
其實佢只不過係一時讀錯，並唔係鬧人，但頻頻甩轆就係真嘅。當時佢係講緊希望政府可以更加大刀闊斧一啲，將撥款加碼，用嚟幫助部分唔想拎綜援，反而靠自己努力工作嘅市民，但就口快快讀錯，講成「大刀潑婦」。
十幾分鐘連環讀錯字
梁美芬喺十幾分鐘嘅發言裏面連環讀錯幾次，本身講到政府額外發放津貼金額，就好似一個月嘅綜援金額，但就唔小心讀成「津援」，可能本來想講津貼同援助啩。佢跟住形容中產人士好慘，但係就再次讀錯，講成中間最「產」嘅人士。唔知係唔係因為會議時間太長，搞到佢太攰呢？