政情：同陳帆傾泊位資訊 議員問到離晒題
現時科技發達，但香港係科技應用上就有所落後，所以運輸及房屋局局長陳帆尋日都要上立法會回答有關發放空置泊車位資訊，但就搞到唔少議員問到離晒題喇！
旅遊界議員姚思榮批評政府向市民發放空置泊車位資訊唔夠實時，又未包括商業公眾停車場嘅車位，認為政府要作出改善。本身呢條問題唔太吸引議員發言，但議員就愈講愈遠，有泛民議員批評現時私家車增長過快，政府應該要去遏抑增長，呢個問題率先被立法會主席梁君彥裁定離題，而陳帆都話無補充。
陳帆話會後再討論
但轉頭又到議員梁志祥犯同一錯誤，批評香港泊車位嚴重不足，見到建設新政府建築物時車位唔夠，結果當然同一命運被裁離題。不過，陳帆見到運輸問題咁令人關注，都好積極話會後再同佢哋詳細討論喎，希望佢可以同樣以積極態度解決問題喇！