中環出更：陳湛文為生意神傷
擾攘多時嘅貿易戰，近日有消息指中美已達成初步協議。儘管詳細內容未公布，但外界普遍憧憬經濟市道縱使未能重回舊觀，但至少唔再惡化。經營製衣業嘅馬主協會副會長陳湛文話貿易戰一打響，就有客戶要求共同承擔額外增加嘅關稅成本，佢話咁做等如變相壓價，若貿易戰能夠休兵，買賣雙方應該都可喘一口氣。
唔單止貿易戰嘅外憂，香港持續咗幾個月嘅示威活動，陳湛文都幾頭痛。佢話九月同十月，係一年當中，外國客戶來港參觀新產品同洽談生意嘅其中一段日子，然而未有止息迹象嘅街頭衝突，令唔少外國客戶裹足，訂單方面難免少咗，而混亂嘅時局，就連內地一提起出口黑色布料同衣着都變得非常敏感，佢話消費者今個冬季若要添置衣物，想選擇黑色就可能較以往困難啦！
談中美較量 史立德：似打乒乓球
香港中華廠商聯合會副會長史立德就話貿易戰雖有初步協議，但相信往後中美雙方仍會好似打乒乓球咁，不斷較量。佢話好多客戶嘅視線已轉移去東南亞國家，由於佢嘅業務屬於內地產業鏈其中一環，生意難免受波及。雖然內地曾倡議發展「大西北」，然而製造業除咗着重人力成本，亦要講求交通基建同工業配套，以及對相關行業嘅管理法規，所以話某個地方要發展製造業，必須具備好多條件，無法一蹴而就。
錶行生意跌 楊衍傑幸業主減租
轉頭見到馬主協會前會長陳湛全同從事零售業嘅錶行董事總經理楊衍傑。楊衍傑話唔明朗嘅時局，導致生意額有些少回落，幸而有部分業主願意調整租金共度時艱。至於時下流行嘅網購又可否取代店舖銷售呢？佢話業務因以售高價錶為主，網購就未必可以向奢侈品嘅買家提供良好嘅消費體驗，所以佢喺網上提供產品資訊為主，銷售方面仍係倚靠各分店同事嘅努力。
卓妮