中環出更：唔知禁蒙面法已生效 梁志祥被寸爆

何君堯遭泛民狙擊

梁志祥就尷尬地話「如果我知道我唔會問啦，你哋呢班人真係反應過敏。」主席黃定光（象哥）諗住打圓場叫大家稍安毋躁，「梁議員唔知，我哋會話畀佢知」，梁再話「我問你哋都可以反應咁大嘅，咩事呀，係咪驚立得成呀？」泛民嘅陳淑莊質疑有議員唔做功課，居然連條例生效都唔知，話簡直係奇迹！佢再提醒梁要睇咗文件先好嚟，話「已經二十二號阿哥，生效咗十幾日喇，醒未？」

另外，何君堯話要畀市民知道有關事情同圖片，鄭松泰一口認同，仲話如果下一張係何同白衣人握手相就可以，跟住民主派議員就一齊狙擊佢，郭家麒提到何同黑社會握手時，何就嚴重抗議對方不斷話佢係黑社會，又話郭家麒「冇醫德」，點知畀民主派話番佢唔聽清楚，話佢同黑社會握手，冇話佢係黑社會，叫佢唔好對號入座。

鄭若驊被點名「傳召」

民主黨黃碧雲就質問保安局局長李家超點解唔嚟，話要佢切腹引咎謝罪，死十次都唔夠之類，又叫象哥「傳召」李家超同律政司司長鄭若驊嚟接受質詢，大家忍唔住提佢唔好話「傳召」，而係「邀請」先啱。

卓妮