中環出更：喺廚房長大 譚奇超14歲識劏雞劏蛇
香港被譽為美食天堂，全靠一班幕後功臣努力，早前喺一個叫做「味之星」頒授禮嘅活動上，其中一位得獎嘅行政總廚譚奇超就形容自己喺廚房長大，正式入行係十四歲，由爸爸帶住，入行第一日爸爸已經叫佢劏雞，第二日仲要劏蛇，自己當時真係嚇到騰騰震咁話。
譚奇超話，爸爸做廚房，所以細細個已經成日跟佢返工，做廚房係一個辛苦嘅行業，講笑話如果你有仇人，叫佢去做飲食，咁就乜嘢仇都報晒喎。
女人可做廚 三姐身體力行
另一名得獎者、香港餐務管理協會副會長蕭秀香（三姐）都係自細就入廚房，佢話爸爸開茶樓，自己細個落去幫手，做吓做吓就入咗行。問起佢細個劏嘢驚唔驚，佢就話，完全冇問題，手起刀落，仲有好多人笑佢，質疑女人做廚房得唔得，後尾自己證明到畀大家睇，女性做廚房係冇問題，其實佢都曾經嘗試去做寫字樓工作，不過唔習慣，最終都係返入廚房做嘢，笑言係注定食呢行飯喎。
當日嘅活動有唔少嘉賓出席，包括九鐵前總裁梁廣灝、中大工程學院副院長黃錦輝等等，梁廣灝講起，香港做飲食出牌非常嚴謹，要符合好多安全條例，但佢強調呢個係好事，因為安全先可以令食客食得放心。
講起安全，得獎嘅行政總廚黃亞保就講起，早期唔係咁多人注重廚房入面嘅安全，所以久唔久都會發生意外，但自從有咗職安健之後，大家對安全意識就提高咗好多，好似有次有個夥計煲緊一大鑊油，自己行開咗，點知爐頭突然起火，好在自己有讀開啲安全課程，知道唔可以用滅火筒，所以就用咗滅火氈去救火。佢仲話，為咗保持安全，有時都要提醒吓啲夥計，叫佢哋保持地下乾爽。
卓妮